Kryeministri i Hungarisë, Viktor Orban, e vlerësoi lart konfirmimin e kandidatit hungarez si komisionar për Zgjerim dhe Fqinjësisë së Bashkimit Evropian.
Oliver Varhelyi, 47 vjeç, e mori dritën jeshile këtë javë nga deputetët e Parlamentit Evropian.
Orban e përshkroi këtë si “suksesin më të madh diplomatik” në një dekadë.
Duke e cilësuar pozitën e Varhelyit si “portofolin më të rëndësishëm evropian në pesë vjetët e ardhshëm”, Orban tha se ai do të mbulojë çështje të rëndësishme, si: migrimin përmes vendeve të Ballkanit, lidhjet me Ukrainën dhe sigurinë energjetike në Kaukaz dhe Azerbajxhan.
Hungarezët tani “mund të rrisin ndikimin e tyre në politikat evropiane”, tha Orban.
Varhelyi ka qenë kandidati i dytë nga Hungaria që është propozuar për komisionar evropian.
I pari, Laszlo Troscanyi, është refuzuar nga Parlamenti Evropian për shkak të konflikteve të interesit.
Në total, Parlamenti Evropian ka refuzuar tre kandidatë: nga Hungaria, Rumania dhe Franca.
Kjo ka qenë edhe arsyeja përse përbërja e re e Komisionit Evropian nuk e ka nisur punën më 1 nëntor, ashtu siç ka qenë e planifikuar fillimisht.