E mërkurë, 18 nëntor 2026

Rubrikat

Mbështet Limit.al

NUK KA TRIBUNË PËR PAVARËSINË E KOSOVËS – Nga Ramiz LUSHAJ (Shkrue me 17 shkurt 2008)

1.

Shenjtori Niketë Dardani, figurë e ndritur e botës iliro-shqiptare, lindur rreth vitit 335, poet, muzikant e shkenctar i madh, jurist e fetarë, misionarë për ungjillimin e gotëve, hunëve e besëve, ka shkruar me dorën e tij “Dardanus sum” ( Jam Dardan ).

Ndaj sot, më 17 shkurt 2008, 17 shekuj më vonë, në këtë Ditë të
Pavarësisë së Kosovës, dua që kjo thirrje shpirtërore, gjenetike e tokësore, të shpërndahet në eterin e kohës, në të 7 kontinentet e botës. Jam Dardan Pellazgjik, i lindur nga kjo Tokë, me këtë Tokë e për këtë Tokë.

Nënat Dardane, siç pohojnë autorë antikë, “i lindnin fëmijët në këmbë”. Për to, “maternitet” ishte Toka. Fëmijët ishin të drejtë si shtiza e Flamurit Shqiptar. Fytyrën e kishin nga Dielli për të dëshmuar përjetësisht se ishin të lidhur shpirtërisht me rrezet e Lirisë.

Emri Dardan shtrihet gjeopolitikisht si ylber në 4 shtete ballkanike,
por ylberon sot me ngjyrat më të bukura të Pavarësisë së Kosovës nga epiqendra e Tokës deri tek orbita e Diellit.

Sot, Ibrahim Rugova, fisnik e sfinks, e ka hequr shallin nga qafa dhe e ka lëshuar si ylber me ngjyrat e Lirisë e Pavarësisë së Kosovës përrreth Globit Tokësor.

Sot, Adem Jashari, nga Prekazi historik, po fluturon si Shqiponjë nëpër Qiellin e Pavarësisë së Kosovës.

Sot, të gjithë Dardanët, e gjithë Shqiptaria, janë shndërruar në ylber gëzimi e flamur lumturie për Kosovën e Pavarur.

Sot, të gjithë Shqiptarët, jemi bërë 17 shkurt…

Sot, 17 shkurti është tek të gjithë Shqiptarët, mbi e nëntokë, tek ëndrrat e martirëve të Lirisë dhe tek kontributet e flamurtarëve të Pavarësisë.

Sot, në Prishtinë, nuk ka Tribunë për Pavarësinë, sepse Aty, në këtë Tribunë janë të gjithë Shqiptarët e miqtë e kësaj dite e date të shenjtë të Shqiptarëve.

2.

Shenjtori Niketë Dardani e shkroi para 1700 vjetësh tekstin e Hymnit të Krishtërimit Perëndimor “Te deum, laudeamus”, që, në Shqip, do të thotë: “Ty, Zot, të Lavdrojmë”.

Ndaj cka, në këtë 17 shkurt 2008, duam të perifrazojmë madhërisht, me mirënjohjen shpirtërore shqiptare: “Ty, Zot, të Lavdrojmë, që i solli Kosovës Pavarësinë !”.

Sot, pikërisht sot, në Hotel Grand, në mes të Prishtinës, kanë ardhë edhe martirët e shek. II, dy shenjtorët binjakë, Flori e Lauri, nga Ulpiana antike e historike, (qëndra më e madhe e krishtërimit të hershëm ilir), për ta shenjtëruar këtë ditë nga gurëthemelet e Tokës Dardane e deri në Qiellin Hyjnor të Zotit të Plotfuqishëm dhe të Kohës së sotme e të nesërme.

Sot, sipas zakonit të saj të përjetshëm, Shqiponja Shqiptare, po i mban flatrat e kthetrat e hapura në Tokën e Qiellin e Pavarësisë së Kosovës.

Sot, si gjithëmonë, si gjithënjë, Shqiponja e imituar dhe e irrituar e Serbëve, po i mban kthetrat e mbyllura, tradicionalisht të mbyllura, sikur don ende ta mbajnë nën vete Kosovën Sovrane e të Pavarur…

3.

Serbët, që kur erdhën në Trojet Etnike Shqiptare, e kanë pasë përshendetje rituale të parë për njëri-tjetrin shprehjen rutinë të nacionalizmit e shovinizmit të tyre primitiv e gjakësor: “Sa ke sundue…”, çka, përndryshe, në rrethanat historike e llogjike, do me thanë: “Sa shqiptarë ke sundue…” !, ( Përndryshe: sa shqiptarë ke nën vete) ! ”.

Por, Ne, Shqiptarët, kurrë nuk e kemi sulmue Beogradin… Përkundrazi, Serbët, gjithëmonë, turrpandalun, e kanë sulmue Nishin, Plavë-Gucinë, Prishtinën, Prizrenin, Shkupin, Ulqinin, Pejën, Mitrovicën…

Ne, Shqiptarët, kurrë nuk iu thamë Serbëve të kapërcejenë Danubin, andej nga erdhën… Përkundrazi, Serbët, edhe nga viti 1830 i Principatës së tyre të Pavarur të Gjergjit të Zi ëndërruan e kërkuan edhe me forcën e armëve ta kenë kufirin e sundimit të tyre deri në lumin Drin…

Shqiptarët pellazgjikë, që lindën nga kjo tokë e në këtë tokë, gjithëmonë iu kanë drejtue njani-tjetrit, me shprehjen engjëllore: “Tungjatjeta” ( T’u Zgjattë Jeta), si mikut, mysafirit e shtegtarit…

Pra, Serbët, kështu, historikisht, që me fjalën e parë përdhendetëse, kërkonin të na rrëmbenin Lirinë në Tokën tonë Etnike e Jetën e dhënë nga Zoti i Gjithëpushtetshëm, ndërsa ne, Shqiptarët, e donim Lirinë e Jetën edhe për Vete, edhe për të Tjerët…

Ky dimension i shpirtit shqiptar i ka marrë sot, më 17 shkurt 2008,
përmasat e Pavarësisë së Kosovës…

Sa herë që të këndohet Hymni i Krishtërimit, i shkruar nga Shenjtori Niketë Dardani para 17 shekujsh, aty do të jetë edhe mirënjohja shqiptare: “Ty, Zot, të Lavdrojmë”, që na solle 17 shkurtin e Pavarësisë së Kosovës…

4.

Homeri Pellazgjik kurrë nuk ka qënë i verbër teksa i shkruante në shek. VIII-VII poemat epike “Iliada” e “Odisea” dhe i hymnizonte Dardanët…Përkundrazi, Homeri i ka pasë sytë si Shqiponja Pellzgo-Iliro-Epirioto-Dardane-Arbnore-Shqiptare. Veçse kishte diçka të veçantë në ligjërimin e tij. Kur vrellonte këngët e veta epike i mbyllte sytë e hynte në botën e magjishme të madhërishme të krijimit, siç bëjnë këngtarët me lahutë te Cikli i Kreshnikëve.

Homeri i përket botës antike shqiptare dhe në rast se ndokush nuk don ta thotë se ishte Dardan nuk mund ta mohojnë se ai Dardanët e hershëm i pa vetëm si Dardanë Epik…

Dhe diçka më duket e besueshme, anipse edhe përtej realitetit kohor: Homeri kur ligjëronte këngët e tij symbyllur e ëndrrimtar, në dritën e shpirtit të tij vizionar kishte edhe Kosovën e sotme Dardane. Kështu, siç e kemi sot, më 17 shkurt 2008, të Pavarur e Sovrane.

Helenët, më saktë Dorët, kur donin t’i cilësonin femrat e tyre në shkallën më sipëriore për bukurinë e madhështinë e tyre, i quanin “Dardane”.

Sot, më 17 shkurt 2008, Kosova po “nusëron”, me “Vellon” e Lirisë, Pavarësinë e saj si Dardane e shek. XXI.

Nuk ka më “krushq të ngrirë” nga acari ruso-serb…

Kosova ka “Krushk të Parë” të Pavarësisë: Amerikën e Bushëve e të Klintonëve, Bashkimin Europian, me Mbretëreshën Elisabeta e kryeministrat britanikë, ku veçohet Toni Bler, Presidentin e Republikës Franceze Sarkozi, Kancelaren Gjermane, Merkel, Presidentin e Italisë, Campi, (që këto 5 shtete kolose e kanë në administrim sektorial Kosovën, sipas mandatimit nga OKB.

Kosova ka “Krushk të Parë” Ismail Qemalin, Isa Boletinin e Ibrahim
Rugovën…, Azem Galicën e Adem Jasharin…, Shaban Polluzhën e Azem Hajdarin…

Kosova ka “Krushk të Parë” Sali Berishën…

Kosova ka mbi 100 shtete të botës, që kanë njoftuar se do të jenë “krushqë” e lajmëtarë të njohjes së Pavarësisë së saj…

5.

Nga sot, më 17 shkurt 2008, në Kalendarin e Botës, do të shënohet kjo Ditë e Shenjtë e Pavarësisë së Kosovës.

Vetë Presidenti i nderuar i Francës, Sarkozi, para pak ditësh, në një shkollë të Francës, iu tha nxënësve që të shënojnë në hartën e botës edhe shtetin më të ri: Kosovën. Ndërkohë që dihet se Franca ishte ajo që dha kontribute aktive për krijimin e Jugosllavisë artificiale në shekullin e kaluar, në mënyrë që ta pengonte Gjermaninë e Austrinë të dilnin në Bregdetin Adriatik…

Sot, 17 shkurti 2008, dëshmon për faktin e lumnueshëm se sa shumë ka ndryshuar Bota, nga Traktati i Shën Stefanit më 1878 deri në Rambuje më 1999, nga Rezoluta 1244 e Këshillit të Sigurimit të OKB deri tek Akti Final i Pavarësisë së Kosovës…

Sot po jetojmë në shek.XXI.

Sot po përjetojmë Rendin e Ri Botëror…

Sot, Kosova, nuk është e vogël me një peshë Pavarësie kaq të madhe e me Miq kaq të Mëdhenj…

Sot Kosova është Kosovë.

6.

Zoti e solli këtë rastësi të bukur: Dita e Pavarësisë së Kosovës, 17 shkurti 2008, është Ditë e Dielë.

Shenjtori Konstandini i Madh, që e shpalli Krishtërimin Fe Zyrtare, me origjinë Dardane, nga Nishi (Naissus) Shqiptar, (dikur kryeqytet perandorak), në vitin 321, para 17 shekujsh, e dekretoi të Dielën si Ditë Pushimi, çka mbetet fuqiplote edhe sot.
Kjo m’u kujtua para një jave, teksa Kryeministri i ri i Kosovës, Hashim Thaçi, deklaronte se ky është uikendi i fundit pa Pavarësinë e Kosovës.

Sot, kjo e Dielë, 17 shkurt 2008, ka Shenjtërinë e saj Shqiptare,
Pavarësinë e Kosovës, por ka edhe diçka nga Shenjtëria e Konstandinit të Madh, që e mbante edhe titullin e lartë “Victor” (Fitimtar) dhe, gjatë gjithë jetës së Tij nuk pësoi asnjë humbje.

Konstandini i Madh, një nga njerëzit më të mëdhenj të të gjitha
kohërave e të njerëzimit, Dardani më i madh në të gjitha epokat shqiptare, nuk mund ta humbiste as këtë rast fatlum, të shpallej Pavarësia e Kosovës në të Dielen e tij, pas 17 shekujsh nga lindja e mbretërimi i tij, me datën 17 shkurt 2008 të shek. XXI, në orën lokale 17.00.

Tungjatjeta, Kosovë Dardane! Ma gëzofsh Pavarësinë si shteti i 193- të i OKB-së!

Më 17 shkurt 2008

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Opinione

    Trazira në Europë, aty ku Perëndimi i trazuar takohet me Lindjen paqësore
  3. Aktualitet

    Prishtina shtrenjton parkimin, deri në 20 Euro për një ditë në qendër
  4. Aktualitet

    Shqipëria dhe Kosova forcojnë bashkëpunimin për shpëtimin në male
  5. Aktualitet

    Bota përballet me mungesë financimi prej 30 trilionë Eurosh

Më shumë nga Histori